જીંદગી ઓછી પડી.

એમને કાયમ અમારી બંદગી ઓછી પડી,

એક ક્ષણને જીવવાને જીંદગી ઓછી પડી.

શક નથી તેની ખુદાઈ પર કદી અમને થયો,

એમને ઈશ્વર થવાને જીંદગી ઓછી પડી.

બંધ આંખે જેમનાં દીદાર મેં હરદમ કર્યા,

એ જ છે તું, માનવાને જીંદગી ઓછી પડી.

પાગલોની નાતમાં છે આ શિરસ્તો કાયમી,

આપને સમજુ થવાને જીંદગી ઓછી પડી.

આ સફર તારા ભણીની છેક ક્યાંથી આદરી,

મમત ખુદની છોડવાને જીંદગી ઓછી પડી.

રાહ તારી, તું જ મંઝિલ, તોય શેની રાહમાં,

પાંપણો ભીની થવાને જીંદગી ઓછી પડી.